الفيس توك وسنينه

ما حدش يستغرب الاسم ايوه الفيس توك زي ما مهند ابني بيقول عليه من زمان على العموم مش ده موضوعنا.............

انا عاوزه افضفض معاكم شويه بخصوص مدونتي الحبيبه وازاي وقع عليها ظُلم عظيييييييييييييم جداً....................

نبدأ من الاول.......

حكايتي مع التدوين بدأت يجي يعني اقل من سنه وكنت مستمتعه جدا بالكتابه والفضفضه واني اعمل حاجه بتاعتي تخصني وكان الموضوع ده مُثمر بالنسبه لظهور مدونتي بشكل كويس الحمدلله..............

إلى أن حدث شئ زلزل كيان مدونتي ......(موسيقى تصويريه)...........

ظهر في حياتي الاخ الجديد وهو الفيس بوك بصراحه عمل شغل هايل معايا وشغَل كل وقتي اللي باقضيه على النت وبذلك اهملت في واجباتي نحو مدونتي العزيزه حبيبة قلبي حكاية الشاطر حسن لأنها فعلاً غاليه على قلبي جداً وانا امامكم وامام كل من يدخل مدونتي اعتذر لمدونتي واقولها عفا الله عما سلف!!!!!!!!!!!!!!!!!!!

ووعد امام الجميع اني هحاول يعني اكون معاكي زي الاول ....

حكاية طوبـــــــــــــــــــــــــــــــــــــه

كان ياما كان في سالف الزمان ........ولد جميل وامور لكن شقي جدا كان له اخوات كتيييييييييير هو كان شقي شقاوه مستخبيه وله اخ اصغر منه بيعمل حاجات فظيعه الولد ده اسمه طوبه ايوه مستغربين ليه !!!!!!!!! ايوه اسمه طوبه شهر عجيب جداً كل سنه يمر علينا بمنتهي البرد والصقيع ولكن السنه دي افتقدناه جداً ولم نشعر بوجوده الا بعد ان اطل علينا اخيه الاصغر امشير الاخ الشقي جداً الذي ترى معه كل فصول السنه من حرو برد إلى تراب و مطر واخيراً زعابيب الاخ امشير المهم يلعب معاك كل الالعاب اللى تتخيلها واللي عمرك ما تخيلتها .

يوم تلاقي نفسك لابس كل الدولاب

اليوم اللي بعده تلبس الدولاب تلاقي نفسك زي المهرجين الناس حرانه وانت عامل زي الكرنبه المحشيه

اليوم الي بعده تخفف شويه يروح عمك امشير يلاعبك لعبة حبيبي والمطر ياااااحبيبي واستحمل جماله

لكن ف وسط دا كله انا فعلاً مفتقده الاخ الاكبر طوبه ده حبيبي اللي كنت بابكي السنه الماضيه من شدة البرد( وانا بيني وبينكم بخاف من البرد الجامد ولا استحمله لكن بحب المطر) المهم كنت طول الشهر اقول فينك يا طوبه اللي ما عبرتنا السنه دي ولو بحتة زلطه من عندك ما فيش يا اخواتي الا وقالي امشير خدي عندك طوب وزلط وتراب ومطر من اللي قلبك يحبه علشان تحرمي تقولي وحشتني يااااااااااا طوبه اصل امشير بيغير جداً من اخوه المفعوص طوبه وللحديث بقيه مع شهر آخر ف السنه...........

عيد الحب

عيد الحب.......... أول عيد حب يمر وأنا معي مدونتي الحبيبة

حكاية الشاطر حسن ...............

هذا سادس عيد حب يمر وأنا متزوجه من الشاطر حسن وحكاياتي معه لا تنتهي ..........

جاء زوجي العزيز اليوم السابق لعيد الحب وقال بكل ثقه(((((( هو النهارده كام ف الشهر))) رديت بكل خبث........

النهارده يا حبيبي 13 ف الشهر.............

قال(( كويس ..)) ( على فكره دي ورده من ضمن ورد حسن جابه بدون مناسبه)

قلت ايه هو اللي كويس

رد((((((((((ان النهارده مش عيد الحب علشان انا نسيت اقولك كل سنه وانتِ طيبه يا حبيبتي واعذريني الايام دي انا مش بفتكر حاجه ف التواريخ))) يعني فيما معناه انه هينسى يقوللى كل سنه وانتِ طيبه النهارده مش مشكله اتعودنا على كده خلينا نفتكر سوا ايه اللي حصل ف السنين اللي فاتت ف احلى عيد حب:

السنه الاولى

المشهد( المكان مظلم اول ما احسست بالمفتاح ف الباب جريت ولعت الشموع)

ملحوظه : انا كنت من فتره واقفه ف البلكونه ف عز البرد

حسن دخل ومعاه اكبر بوكيه ورد احمر شفته في حياتي كلها مش عارفه كان شايله ازاي

(وكانت ليله يا عمده)

السنه الثانيه

المشهد (نفس المنظر السابق ولكن معي الاخ مهند شايلاه على قلبي وواقفه وراالزجاج علشان خايفه عليه م البرد منتظره بابا)

البوكيه السنه دي اصغر شويه صغيرين

اول ما دخل حسن وشاف مهند قاله(اهـــــــــــــــــــــــــــــــــــــــــــــــــــلاً!!!!!!!!!!)

السنه الثالثه

المشهد( نفس المنظر ومهند نايم)

حسن دخل بنفس البوكيه ومعاه هديه صغيره

والشمع موجود وبنتعشى على ضوء رومانسي(وف عز الرومانسيه)

حسن قال ايه الضلمه دي انا مش شايفالاكل عينيا وجعتني نوري النور!!!!!

السنه الرابعه

المشهد(نفس المنظر وانا حامل ف جنى)

حسن دخل ايد ورا وايد قدام

انزعجت وافتكرت نسي حتى الهديه

ولكن..........................

حسن جايب هديه في جيبه مما خف وزنه وغلا ثمنه

السنه الخامسه

المشهد (نفس المنظر ومعايا عيلين وواقفه متأهبه وبقول لنفسي امتي ييجي بقى)

((طبعاً العمده مش مبسوط السنه دي))

حسن دخل ومعاه اصغر بوكيه ورد شفته في حياتي ولكنه زجاجة برفن على شكل ورد احمرجميله معايا لحد دلوقتي

السنه دي وهي السادسه ربنا يستر ويفتكرني بكلمه وسط زحمة الحياه وكل سنه وانتم طيبين

وعيد حب سعييييييييييييييييييييييييييييييييييييييييييييييييد

ف عز الشتا

ف عز الشتا وانا راكبه الميني باص وانا انظر من الشباك إلى كل ما حولي ومن حولي

افتكرت حاجات كثيره

مرت عليّا من ذكريات الطفوله

إلى الشباب

إلى احلى ايام الجامعه

ف عز الشتا .....................

احلى ايام الرحلات والمعسكرات (كنت ايام الجامعه مشتركه في نشاط الجواله بالجامعه) .........

وكانت امي دائما تعنفني بشده وتقول(في بنت ف الدنيا دي تشترك ف الجواله وتبهدل نفسها رحلات ومعسكرات انا ما بقتش بشوفك حتى ف عز الشتا) احلى ايام عمري ............................ف عز الشتا

وكنا وقتها لانحس بالبرد او الحر الغريب ف الموضوع اني كل ما اشوف المطر اتذكر اغنية علي الحجار.......

لمّا الشتا يدق الببان.........

لمّا تناديني الذكريات.........

لمّا المطر يغسل شوارعنا القديمه والحارات

................انا بحب الاغنيه دي جداً ولنا معاً ذكريات كثييييييييييييييييييييييييييييييييييييره بس بحبها

وبفتكر كمان اختي هوبه لأننا كنا بنحب نفس الاغنيه وكنا ننزل ف المطر ونغنيها سوا ف عز الشتا.

كمان بيفكرني المطر بابني مهند كنت ارجع من شغلي على حضانته
وناخدها مشي على رجلينا ف عز المطر
واحنا بنجري ورا بعضنا مثل الاطفال ونضحك انا وهو
والمطر نازل علينا واحنا بنتنطط
لغاية ما نوصل البيت مبلولين من المطر
وكان يضحك وينظر للسما ببراءه ويقوللي ماما امبوووووووو.........................
.ولكن وسط ده كله لا انسي ان احمد ربنا واشكر فضله ................................
ان عندي بيت يضمني والجأ لجدرانه ويحميني ف عزالشتا ...........................
.ف وسط ذكرياتي انظر للاطفال ف الشارع من غير مأوي ولا بيت يضمهم.....................
ارتعش من مجرد فكرة اني الاقي نفسي من غير بيت....................
بيتي هو زوجي ............
.بيتي هو اولادي.............................
بيتي هو وطني الحقيقي اللي بياخدني ف احضانه وجدرانه ف عز الشتا .......................

الصديقان

أرجو ألا اضايق احد بما ادون ولكن جال بخاطرى ان اشارككم معي في هذه القصه القصيره من واقع الحياه إنها قصة صديقان حميمان لا يفترقان يقتسمان الفرحه والضحكه وقبل ذلك كله يتشاركان الاحلام والاحزان امضيا معاً احلى سنوات الشباب والشقاوه اسرا لبعضهما بقصص الحب الجميله عاشاها معاً وعاشا ايضاً الاخفاق في الحب معاً والزواج من شريكة عمر كلٍ منهما معاً كانت الاحلام واحده ولكن مع الفارق في طريقة التنفيذ لا يكترثان بالمآسي وتمر عليهما مر الكرام ماداما يقتسماها الضحكه لم تفارق شفة اىٍ منهما حتى في احلك المواقف العصيبه سافرا معاً من اقاصي الصعيد إلى قاهرة المُعز حيث كانت الضحكه من قلبيهما ....................
ولكن الحياه لا تسير كما يشتهي الفرد منا ........في يوم من الايام القريبه سمعت مصادفةً أن الصديق الاول مريض فقمت على الفور بالاتصال به هاتفياً (لأن المسافه بيني وبينه بعيده ) وهالني ما سمعت ....................ماتت الضحكه وحل محلها صوت حزين يأتي من أعماق الحزن الدفين صوت لم اسمعه من قبل!!!!!!!!! وتساءلت ماذا حدث اين الضحكه المميزه التي كنا نسمعها منذ ان كنا اطفال ونضحك من قلبنا لمجرد سماعها ودون ان نعرف لماذا نضحك لقد علمت أن صديق عمره ونصفه الثاني قد توفاه الله صُدمت ولكن الصدمه الاكبرمن ذلك انه توفي وهو بين ذراعي صديقه وتؤامه لحظه خروجهما من المستشفى بعد علمهما ان الصديق الثاني مريض بالسرطان لم يحتمل قلبه الرقيق هول المأساه وهو الشاب الملئ بالحياه والحيويه (ازمه قلبيه نتيجة صدمه) وقع الصديق الاول على الارض مع رفيق عمره ...حاول ان يمد له يد العون ولكن لم يستطع راح الصديق الوفي واصيب الصديق الاول في رأسه وعينه ولكن.................... الاصابه الاكبر كانت في روحه نعم لقد انكسرت روحه ونفسه ولم يعد له رغبه في الحياه بعد فقد روحه ....................انهما الصديقان الاول(سامي) والثاني (مصطفى) سامي هو خالي الحبيب المرح أما مصطفي فهو صديقه وتؤام روحه الذي غاب عنا في غمضة عين أنا لم ارى مصطفى ابداً في حياتي ولكن قصصه ونوادره وروحه معنا في كل وقت يكون خالي سامي متواجد معنا ولم يعد بيدنا شئ لنقوله إلا(إنا لله وإنا إليه راجعون) ويارب يلهمنا جميعاً الصبر والسلوان ولك الله يا خالي الحبيب وتعود الينا كما كنت انشاء الله.

لكل ذي فضل

نعم لن أنسي مَن له الفضل في ظهور هذه المدونه للنور من بداية التخطيط لها إلى ظهورها الآن ولولاه لكنت مازلت احاول ولم تروا مدونتي إنها حبيبة قلبي الغاليه هوبه بوبو التي لديها مدونه بالفعل(حكايات بوبو) والتي عندما قرأت مدونتها حاولت ان يكون لي مدونه خاصه حاولت وحاولت ثم حاولت وقمت بتصميمها على هذا النحو الذي ترونه ولكن لم يتم العثور عليها وبفضلها واظن بفضل زوجها الحبيب وليد (كينج توووووووت) تم ظهور مدونتي للنور بعد أن قالت لي هوبه اذهبي انت ومدونتك إلى جحيم المدونات وفي روايه اخرى (عليكى اللعنه انتي ما عملتيش مدونه اصلاً) ضحكت كثيراً ولكن انتابتني حالة من الاحباط فبعد هذا العذاب وسهر الليالي لا يرى احد ما ادون! ولكن شكرا يا حبيبتي والى ان اراكى لكى قبلاتي الحارة ودائما ً اتعلم منكم التدوين ( على فكره بوبو هى اختي الصغرى وآخر العنقود).

أجمل يوم في حياتي

نعم اجمل يوم في حياتي .........إنه يوم لن أنساه ما حييت ......يوم تاريخي........ يوم تتمناه كل أم ...........وهو رؤية ولدها وفلذة كبدها بملابس المدرسه ومغامرات أول يوم مدرسه وكيفية الاعداد له فعلا لن انساه ولن انسى فرحة مهند وهو يختار الشنطه التي اشترط ان يكون عليها الاخ سبايدر مان (فارس احلامه ويقظته) وايضا وهو يختار الشوز المنور والشراب المرسوم عليه فارس احلامه نفدت من ذلك علية الطعام التي لم نجد التى عليها سبايدر لن انسى الفرحه في عينيه البريئه وهو يرتدي ملابسه ويذهب للمدرسه ويحمل الشنطه والزمزميه وعلبة طعامه في منتهى النشاط وعندها تذكرت أيام طفولتي وكيف كنت احب المدرسه ولا احب التأخر عليها(إنه تقليد عائلي حضور طابور الصباح) والآن انتهي مهند من التيرم الاول وأخذ أجازة نصف العام (يا ويلييييييييييييي) وأنا خائفه من نتيجه التيرم (اصله شهاده يا ناس) كى جي وان وربنا يوعدكم بالشهادات!!!!!!!!!!!!!!!!!!!!!!!!!!!!!

زهرة عمري

إنها ليست زهرة عمرٍ واحدة بل أحلى ثلاث زهرات في عمري زوجي حبيبي الذي طالما حلمت به في حياتي والزهره الثانيه ولدي مهند أما الثالثة فحبيبة قلبي جنى التي لم اتوقع أن أحبها كل هذا الحب مع العلم بأنني أحب الأولاد أكثر أحبائي أُهديهم أحلى ما في حياتي فزهور الدنيا لا تكفيهم